پنجاب حکومت نے محرم الحرام کے دوران امن و امان برقرار رکھنے اور سیکیورٹی کے مؤثر انتظامات کو یقینی بنانے کے لیے پاک فوج اور رینجرز کے دستے طلب کر لیے ہیں۔ اس سلسلے میں محکمہ داخلہ پنجاب نے وفاقی وزارت داخلہ کو باقاعدہ مراسلہ ارسال کر دیا ہے۔
حکام کے مطابق محرم الحرام کے دوران مجالس، جلوسوں اور دیگر مذہبی تقریبات کی سیکیورٹی کے لیے اضافی نفری تعینات کی جائے گی تاکہ کسی بھی ناخوشگوار واقعے سے بچا جا سکے۔ قانون نافذ کرنے والے ادارے صوبے بھر میں سیکیورٹی انتظامات کی نگرانی کریں گے اور عوام کے جان و مال کے تحفظ کو یقینی بنائیں گے۔
محکمہ داخلہ کی جانب سے پنجاب کے 39 اضلاع میں فوج اور رینجرز کی مجموعی طور پر 137 کمپنیوں کی خدمات مانگی گئی ہیں۔ ان میں پاک فوج کی 61 جبکہ رینجرز کی 76 کمپنیاں شامل ہیں۔ یہ دستے مختلف اضلاع کی ضروریات اور سیکیورٹی صورتحال کے مطابق تعینات کیے جائیں گے۔
حکام کا کہنا ہے کہ فوج اور رینجرز کے اہلکار یکم محرم سے 11 محرم تک اپنے فرائض سرانجام دیں گے۔ اس دوران حساس علاقوں، جلوسوں کے راستوں اور اہم مقامات پر خصوصی سیکیورٹی انتظامات کیے جائیں گے تاکہ محرم الحرام کے تمام پروگرام پرامن ماحول میں منعقد ہو سکیں۔
پنجاب حکومت کا کہنا ہے کہ محرم الحرام کے دوران امن و امان کے قیام کے لیے تمام متعلقہ اداروں کے ساتھ مکمل رابطہ رکھا جا رہا ہے اور سیکیورٹی کے حوالے سے ہر ممکن اقدامات کیے جائیں گے
